Beint á leiðarkerfi vefsins
Fara á forsíðu

Íslandsbanki

Íslandsbanki var stofnaður í kjölfar neyðarlaganna þann 8. október 2008 til að halda utan um innlendar innstæður og meirihluta íslenskra eigna Glitnis. Bankinn var alfarið í eigu ríkisins fram til október 2009 er ríkið komst að samkomulagi við kröfuhafa (skilanefnd Glitnis) um að þeir eignuðust 95% eignarhlut í bankanum. Samkomulagið var gegn niðurfellingu skulda Íslandsbanka við Glitni og að eiginfjárframlag ríkisins gengi til baka að mestu en að ríkið ætti um 5% af hlutafé bankans eða 500 milljónir kr. að nafnvirði. Ríkið veitti bankanum stuðning við eiginfjár -og lausafjárstöðu bankans meðal annars í formi víkjandi láns að fjárhæð 25 milljarða kr.

Sem hluta af stöðugleikaframlagi kröfuhafa Glitnis var ríkinu afhentur 95,0% eignarhlutur í Íslandsbanka hf. og fer ríkið því með 100,0% eignarhlut í bankanum. Á aðalfundi Íslandsbanka hf. sem fram fór þann 19. apríl sl. voru eftirtaldir einstaklingar kjörnir í stjórn bankans. Friðrik Sophusson, formaður, Árni Stefánsson, Anna Þórðardóttir, Auður Finnbogadóttir, Hallgrímur Snorrason, Heiðrún Jónsdóttir og Helga Valfells. Varamenn eru Herdís Gunnarsdóttir og Pálmi Kristinsson.